Namo Shetkari Yojana: राज्य शासनाच्या नमो शेतकरी महासन्मान निधी योजनेचा आठवा हप्ता अजूनही शेतकऱ्यांच्या खात्यात जमा झालेला नाही. त्यामुळे जिल्हाभरातील लाखो शेतकरी रोज बँक, कृषी कार्यालये आणि ऑनलाइन पोर्टलच्या चौकशा करत आहेत. मात्र, “आज नाही, उद्या येईल” यापलीकडे ठोस उत्तर कुठेच मिळत नसल्याने शेतकऱ्यांमध्ये प्रचंड अस्वस्थता आहे.
या योजनेअंतर्गत पात्र शेतकऱ्यांना दरवर्षी ६ हजार रुपये, तीन समान हप्त्यांत थेट बँक खात्यात दिले जातात. शेतीला आधार देणारी ही रक्कम बी-बियाणे, खत, औषध किंवा घरखर्चासाठी उपयोगी पडते. मात्र, आठवा हप्ता रखडल्याने अनेक शेतकऱ्यांचे आर्थिक गणित कोलमडले आहे.
निवडणूकपूर्व आशा फोल ठरली
स्थानिक स्वराज्य संस्थांच्या निवडणुकीपूर्वी हा हप्ता जमा होईल, अशी जोरदार चर्चा होती. अनेक शेतकऱ्यांनी त्यावर विश्वास ठेवून वाट पाहिली. पण निवडणुका जवळ येऊनही निधी न आल्याने ती अपेक्षा फोल ठरली. दुसरीकडे केंद्र सरकारच्या पीएम किसान योजनेचा २१ वा हप्ता महिनाभरापूर्वीच शेतकऱ्यांच्या खात्यात जमा झाला आहे. त्यामुळे “राज्याचा हप्ता कधी?” हा प्रश्न अधिकच तीव्र झाला आहे.
ई-केवायसी आणि पडताळणीचा अडसर
कृषी विभागाकडून सांगण्यात येते की, यंदा ई-केवायसी आणि लाभार्थी पडताळणी अधिक काटेकोर करण्यात येत आहे. ज्यांनी ई-केवायसी केलेली नाही, आधार-बँक लिंकिंग अपूर्ण आहे किंवा जमिनीच्या नोंदींमध्ये त्रुटी आहेत, अशा शेतकऱ्यांना तात्पुरते वगळण्यात आले आहे. यामुळे लाभार्थ्यांची संख्या कमी झाली असून, अनेक पात्र शेतकरीही तांत्रिक अडचणींमुळे अडकले आहेत.
२.८४ लाख शेतकरी प्रतीक्षेत
जिल्ह्यात २ लाख ८४ हजारांहून अधिक शेतकरी या योजनेचे लाभार्थी आहेत. अचलपूर, अमरावती, अंजनगाव, चांदूर बाजार, दर्यापूर, मोर्शी, वरुडसह सर्व तालुक्यांत मोठ्या संख्येने ई-केवायसी पूर्ण झाली आहे. तरीही हप्ता न आल्याने शेतकरी रोज चौकशीसाठी धाव घेत आहेत. कधी पोर्टल बंद, कधी सर्व्हर डाऊन, तर कधी “डेटा अपडेट चालू आहे” असे कारण सांगितले जाते आणि शेतकऱ्यांना रिकाम्या हाताने परतावे लागते.
आचारसंहितेचा अडसर आहे का?
१२ जिल्ह्यांत जिल्हा परिषद निवडणुकीची आचारसंहिता लागू असली तरी उर्वरित २० जिल्ह्यांत कोणतीही आचारसंहिता नाही. त्यामुळे निधी वितरणाला तांत्रिकदृष्ट्या अडसर नसावा, असे शेतकऱ्यांचे म्हणणे आहे.
“मग हप्ता का अडकला?” हा प्रश्न आता उघडपणे विचारला जात आहे.
पीएम किसानसोबतच मिळणार का?
अनेक शेतकरी असा अंदाज लावत आहेत की, पुढील पीएम किसान हप्त्यासोबतच नमो शेतकरीचा निधी जमा केला जाईल. मात्र, याबाबत शासनाकडून अद्याप अधिकृत घोषणा झालेली नाही. त्यामुळे अफवांवर विश्वास ठेवण्यापेक्षा अधिकृत माहितीकडेच लक्ष ठेवण्याचे आवाहन कृषी विभाग करत आहे.
शेतकऱ्यांना काय करावे लागेल?
- ई-केवायसी त्वरित पूर्ण करा
- आधार-बँक खाते लिंक आहे का ते तपासा
- जमिनीच्या नोंदीतील त्रुटी दुरुस्त करा
- कृषी कार्यालयात अर्जाची स्थिती तपासून घ्या
आठव्या हप्त्याची प्रतीक्षा कायम
आयकर भरणारे, सरकारी सेवेत असलेले किंवा अपात्र ठरलेले लाभार्थी वगळल्यानंतर खरोखर गरजू शेतकऱ्यांनाच हा निधी मिळणार आहे, असे शासनाचे म्हणणे आहे. मात्र, निधी कधी मिळणार याची तारीख न सांगितल्याने शेतकऱ्यांची प्रतीक्षा संपायचे नाव घेत नाही. Namo Shetkari Yojana
शेती आधीच निसर्गाच्या भरोशावर आहे. त्यात जर सरकारी मदतीचाही आधार वेळेवर मिळत नसेल, तर शेतकऱ्याने कुणाकडे पाहायचे? नमो शेतकरीचा आठवा हप्ता हा केवळ पैसा नाही, तर शेतकऱ्यांच्या आशेचा आधार आहे. तो आधार वेळेवर मिळेल, हीच अपेक्षा.